रेसुङ्गा क्षेत्र र सम्भावना

– कृष्ण विश्वकर्मा (विजय)
२) अमला खेती
गुल्मी जिल्ला, रेसुङ्गा नगरपालिकाको शिरको रुपमा बहुआयामिक महत्व बोकेको रेसुङ्गा पहाड रहेको छ । यसका दर्जनौ फाईदा मध्ये जडीबुटी सम्बन्धि छोटा लेख लेख्नेक्रममा यो पटक अमला बारे लेख्दैछु । सस्कृतमा आमलकी पनि भनिने यसको वैज्ञानिक नाम Phyllanthus emblica हो । १०० मिटर देखि १५०० मिटरसम्म उचाई रहेको भुभाग र १६ देखि ३० डिग्री सेल्सियस तापक्रममा अमलाको खेति राम्रोसँग हुने गर्दछ । हाम्रो वरिपरी प्राकृतिक रुपमै हुर्केबढेका केही बोटहरु रहेपनि यसको ब्यवसायिक खेति हुन सकेको छैन । विरुवा लगाएको ३ वर्षदेखि १० वर्षसम्ममा अत्याधिक फल लाग्ने गर्दछ ।
अमलालाई हामीले धेरै तरिकाले उपभोग गर्न सकिन्छ । यसको दाना नै खान सकिन्छ । जुस बनाएर खान सकिन्छ । अचार राखेर लामो समयसम्म भान्सामा प्रयोग गर्न सकिन्छ । दानालाई सुकाईसकेपछि धुलो बनाएर पनि सेवन गर्न सकिन्छ ।
विश्वव्यापी महामारीको रुपमा फैलिएको कोभिड–१९ कोरोनाबाट बच्नको लागी हामिले आफ्नो रोग प्रतिरोधी क्षमताको बृद्धि गर्नु जरुरी छ । स्वास्थ्यकर्मीका अनुसार रोगप्रतिरोधी क्षमता बढाउन भिटामिन सी युक्त खानेकुरा नियमित खानुपर्दछ । अमलामा पनि भिटामिन सी प्रशस्त मात्रामा पाईने गर्दछ । अमलाको सेवनले रोगप्रतिरोधी क्षमता बढाउने गर्दछ । पेट र पाचन प्रणालीमा रहेका समस्यालाई समाधान गर्ने , रगत शुद्ध गराउने, मृगौलाको काम गर्ने क्षमता बढाईदिने, छालाजन्य रोगलाई न्युनिकरण गरेर मुहारमा चमक ल्याईदिने, आँखाको दृष्टि क्षमतालाई मजबुत बनाउने जस्ता अनेकौअनेक फाईदा अमलाको छ । औषधिय गुण भएका आप्mनै वरीपरी सजिलै पाईने अमला जस्तै सयौ जडिबुटी हामिले चिन्न र प्रयोग गनै सकिरहेका छैनो ।
रेसुङ्गा क्षेत्रमा पाईने जडिबुटी मध्ये साउने ब्लकमा अमलाको व्यवसायिक खेती गर्न सकिने सम्भावना रहेको छ ।रेसुङ्गा नपाको अन्य क्षेत्रमा पनि नहुने हैन तर साउने क्षेत्रमा बढी उत्पादन हुने गर्दछ । व्यवसायिक रुपमा खेति गरेर रेसुङ्गा नगरपालिकाबासीको आर्थिक उपार्जनमा सहयोग पुग्नेगरी योजना बनाउन र कार्यान्वयन गर्न नगरपालिकाले ढिलो गर्नु हुदैन । भारतीय कम्पनि पतन्जली र डावरबाट उत्पादित अमलाको जुसले नेपाली बजार ढाकेको छ यसलाई नियन्त्रण गर्नको लागि हामीले व्यापक मात्रामा अमलाको उत्पादन गर्ने अनि जुस बनाएर बिक्रीवितरण गर्ने योजना बनाउनुदर्छ । अचार बनाउने तालिमको लागी धेरै खर्च पनि लाग्दैन खाली बस्नुहुने दिदीबहिनीहरुको लागी अमलाको अचार बनाउने कार्य आम्दानिको राम्रो स्रोत हुनसक्दछ । भोक लागेका बखत चौरासी ब्यन्जन र खिरका आश्वासन हैन बासी आटो र चाम्रा रोटी भए पनि उपलब्ध गराउन रेसुङ्गा नगरपालिकाको नेतृत्वले सक्नुपर्दछ । ठुलाठुला योजना पनि गर्दै जाउला तर भँुईतहका जनताको जिवनस्तर उकास्नको लागि पनि व्यवसायिक कृषि, पशुपालन, जडीबुटी खेतिमा रेसुङ्गा नगरपालिकाले अलि बढी ध्यान दिएमा राम्रै हुने थियो ।