यम सोमै

चैत -१८ । कामको खोजीमा ३० वर्ष भारतमा बिताएका गुल्मी थोर्गाका महेन्द्र सोमैले रिडीमा अटो चलाएर परिवार पालेका छन् । भारतमा हुँदा तीन पाङ्ग्रे स्कुटर चलाउन जानेका सोमैले नेपाल आए पछी तीन पाङ्ग्रे अटो चलाउने पेसा छानेका हुन् ।

करिब २ वर्ष बुटवलमा अटो चलाएका सोमैले विगत डेढ वर्ष देखि रिडीमा नै अटो चलाउन थालेका हुन् । आफ्नै परिवारको न्यानो माया , जन्म दिने आमाको काखमा बसेर काम गर्न पाउदा आफुलाई खुसी लागेको सोमैले बताएका छन् । १३ वर्षको उमेरमा भारत छिरेका सोमै हाल ४८ वर्षका भएका छन् । आफ्नै घरमा प्राण भन्दा प्यारी श्रीमती , प्यरो छोरा र जन्म दिने आमाको काखमा बसेर कमाएको कमाईबाट सन्तुष्ट भएको बताउदै सोमैले मेहनत गरे यहीँ पनि परिवार पाल्न सकिने बताउनुभयो ।

आफुले अहिले साहुको अटो चलाए पनि आफ्नै अटो किनेर चलाउने रहर भएको समेत बताउनु भयो। विदेशमा गएर पसिना बगाउनुको साटो नेपालमै काम गर्दा राम्रो हुने सोमैले बताउनु भयो।