नमस्ते नेपालले गर्‍यो क‍रोना महामारीमा खट्नेलाई सम्मान

२७-असार, बुटवल । रुपन्देहीको तिलोत्तमामा क्रियाशील सामाजिक संस्था नमस्ते नेपालले कोरोना भाइरस (कोभिड–१९) को दोस्रो महामारीमा अग्रपंक्तिमा खटिएका विभिन्न क्षेत्रका ४ जना व्यक्तिहरुलाई शनिबार तिलोत्तमाको वनवाटिकामा सम्मान गरेको छ । सम्मान कार्यक्रममा बोल्दै लुम्बिनी प्रदेशका स्वास्थ्य तथा जनसंख्या मन्त्री भोज प्रसाद श्रेष्ठले युवाहरुले कोभिड्का बेला देखाएको सतर्कता, सामाजिक क्रियाकलाप र स्वास्थ्य चेतनाका विषयमा गरेको सेवामुखी कार्यले आफुलाई उत्साहित बनाएको बताए । उनले कठिन स्वास्थ्य अवस्थाका बेला स्थानिय स्तरमा युवाहरुले समाजमा मिलेर कार्य गरेको र एम्बुलेन्स चालक समेत नपाएको अवस्थामा परिवार र आफैलाई समेत जोखिममा राखी कार्य गरेको र सुरक्षार्थ खटिएका प्रहरी जवानमा विशेष शुभकामना सहित धन्यबाद ज्ञापन गरेका थिए।

आफू र आफ्नो परिवारलाई समेत जोखिममा पारेर खटिएका २ जना एम्बुलेन्स चालक र २ जना सुरक्षाकर्मीलाई सम्मान गरिएको हो । सम्मानित हुनेमा तिलोत्तमा नगरापालिका नगरप्रमुख बासुदेव घिमिरे र उपप्रमुख जगेश्वर चौधरीले प्रयोग गर्दै आएको स्कार्पियोलाई एम्बुलेन्स बनाई चलाउने चालकहरु राजु शर्मा र हरि ठाकुर तथा सुरक्षामा खटिएका प्रहरी जवान दिपेन्द्र कार्की र सुकनारायण श्रेष्ठ रहेका छन् । कोभिड्को दोस्रो भेरीयण्टले जनता त्राहि त्राहि भएको बेला दुवै जना एम्बुलेन्स चालक संक्रमितलाई अस्पताल पुर्‍याउने तथा संक्रमितको मृत्यु भएपछि दाहसंस्कारका लागि घाटसम्म लैजाने कार्यमा सहयोग गर्दै आएका थिए । कोभिड–१९ महामारीमा अरु एम्बुलेन्स चालकहरु खट्न नमानेको अवस्थामा उनीहरुले अगाडि सरेर सेवा दिएका थिए । यसैगरी सम्मानित हुनेमा दिनरात नभनी आइसुलेसन तथा सडक सुरक्षामा खटिएका प्रहरी जवान रहेका छन् । प्रहरी जवानले विरामीको औषधि व्यवस्थापनमा समेत सहयोग पुर्‍याएका थिए ।

सो अवसरमा बोल्दै तिलोत्तमा नगरपालिकाकी नगरउपप्रमुख जगेश्वर चौधरीले एम्बुलेन्स चालक र प्रहरी जवानहरुले देखाएको बहादुरिले काम गर्ने हौसला र आगामी दिनमा समेत अरु युवाका लागि प्रेरणा दिएको बताइन । नमस्ते नेपालका अध्यक्ष अर्जुन खरेलले युवाहरुको प्रेरणाका लागि सधै एककदम अगाडी रहेर सेवा र सामजिक भावनाले अघि बढेको संस्थालाई सबैको साथले अझ अघि बढ्ने प्रेरणा मिलेको बताए। उनले महामारीका बेला जनचेतना दिने, औषधी, अक्सिजन, बिरामी परामर्श दिने र आत्मबल बढाउन सस्थाले प्रयास गरेको बताए।

कार्यक्रममा तिलोत्तमा नगरपालिका वडा नम्बर २ का वडा अध्यक्ष दधिराम गौतम, नेपाल बाल संगठन रुपन्देहीका अध्यक्ष साजन भण्डारी, शेषकान्त भण्डारी, मनिष भुसाल, निरन्जन खरेल, सम्मानित मध्ये प्रहरी जवानको तर्फबाट दिपेन्द्र कार्की लगायतले आफ्नो भनाइ राखेका थिए।