दशैमा गाउँ घरमा पनि चहलपहल न्यून

कार्तिक -१० ,यो वर्षको नेपालीहरुको महान् चाड बडा दशैमा चहलपहल शहरमा मात्र नभई गाउँ घरमा पनि न्यून देखियो । कोरोना महामारीको जोखिम उच्च रहेकोले आफ्नो जन्म घर फर्कनेहरुको सङ्ख्यामा पनि उल्लेख मात्रामा कमी आएको देखियो। कालीगण्डकी गाउँपालिकाले पनि गाउँ प्रबेश गर्न भारत , तेस्रो मुलुक र संक्रमण जोखिम रहेका स्थानबाट गाउँपालिका प्रवेश गर्ने महानुभावहरुलाइ ७२ घण्टाभित्रको पिसिआर नेगेटिभ सहित प्रबेश गर्न अनुरोध गरेको थियो। पिसिआर नेगेटिभ रिपोर्ट नभएकाहरुले गाउँपालिकाले तोकिएको क्वारेन्टिनमा बस्न पर्ने नियम लगाइएको थियो। जसबाट पनि कालीगण्डकी गाउँपालिका प्रवेश गर्नेहरुको सङ्ख्यामा उल्लेख मात्रामा कमि आएको हो भन्न सकिन्छ । आफू र आफ्नो परिवारलाई सुरक्षित राख्न जो जाहा छ त्यही दशै मनाउन सरकारको आग्रह पनि थियो।

दशैमा घर फर्कनेहरुको भिडभाड हुने अनुमान गरिएको थियो। हाल मिर्मीमा अवस्थित सामुदायिक क्वारेन्टिनमा ४०/४५ जना क्षमताको क्वारेटिन स्थल भरिभराउ हुने अपेक्षा गरिएको थियो। तर गाउँपालिकाको घोषणा पश्चात् क्वारेन्टिनमा जम्मा २० जना मात्र आइपुगेका थिए। उनिहरुलाइ पनि दशै पर्व मनाउनका लागि ७ गते होम क्वारेन्टिन्मा रहने गरि घर पठाइएको कालीगण्डकी गाउँपालिकाका स्वास्थ्य शाखाका जन-स्वास्थ्य निरिक्षक खडक बहादुर थापाले जानकारी दिनुभयो। उनीहरु सवैको पिसिआर रिपोर्ट नेगेटिभ आएको समेत जन स्वास्थ्य निरीक्षक थापाले बताउनु भयो। कालीगण्डकी गाउँपालिकाले गरेको अनुरोध र आह्वानलाई नागरिक समुदायबाट पनि समर्थन मिलेको देखिएको छ।